<< Retour

Actes du Parlement de Paris / Vacations de l’année 1321 / Arrêt contre le maire, les consuls et recteurs de Périgueux / n° 6489

" Cum in curia nostra Remundus Bruni, clericus, pro se et nomine procuratorio aliorum clericorum civitatis et ville Petragoricensis, videlicet Petri de Capella, Ademari Albiron, Petri de Copier, Petri de Jarzen, Iterii Blanchi, Helie de Selevania, Guidonis de Guiraudo, Arnaldi de Rodes, Bernardi de Liman, Remundi Magnen, Geraldi de Capeta, Gerardi de de Borno, Petri de Rupe Sancti Martini, Johannis Oliverii, Guillelmi de Colho, Arnaldi Pinelli, Petri de Petit, magistri Helie Mercerii, Guillelmi Mahain, Geraudi de Ponte, B. de Bosqueto, Helie de Rabreyra, Bernardi de Petit, Johannis Le Selier, Guillelmi Bulpharina, Petri de Bona Hora, Petri Andree, Plasculphi de Limant, Petri de Mauri, Gerardi Boni, Helie Boni, Guillelmi de Gordono, Guillelmi de Pomello, Ademari de Tort, Remundi Barrailhier, Petri Gaufridi, Stephani de Sudor, Guillelmi Umhal, P. et Johannis de Pelhicier, Helie Salsayro, Adhemari Fraichevel, Helie Textoris, Johannis de Turre, Bernardi de Cornardor, Remundi de Bolhens, Johannis de Combio, Petri de la Rocha, Gerardi de Combis, Helie Bruni senioris, Petri de Pescher, Guillelmi de Merdemer, clericaliter, ut dicebatur,  viventium, quam plurimum conquereretur de majore et consulibus ac rectoribus predicte civitatis et ville Petragoricensis, super eo quod cum ipsi major, consules et rectores, eorum meritis exigentibus, dudum per sententiam privati fuissent in perpetuum honore, majoratu, consulatu et rectoratu dicte ville et occasione predicta consulatus dicte ville ad manum domini genitoris nostri positus fuisset et in manu nostra longo tempore extitisset; ac tandem ipsi quamplurimum recuperare honorem pristinum affectantes et quod consulatus et jurisdicio ipsius per eos regeretur et ipsi honorem et regimen hujusmodi recuperassent a nobis, mediante certa pecunie quantitate, et demum dictos clericos tailliassent per dicta pecunia nobis solvenda contra ecclesiasticam libertatem, ut dicebant, quamvis in possessione libertatis non solvendi tailliam pro comunibus omnibus dicti loci prefati clerici pro se et omnibus eorum bonis essent et fuissent, ut dicebant et eorum predecessores tanto tempore quod sufficiebat ad libertatem acquirendam.

Quare petebat dictus procurator pro se et nomine quo supra per nostram curiam pronunciari, ipsum et dictos clericos esse et debere teneri et defendi cum omnibus eorum bonis in possessione et saisina libertatis seu franchisie non contribuendi in colleta seu taillia predicta de qua predicti major et consules molestabant eosdem et impedimentum hujusmodi appositum, predictis clericis in sua saisina libertatis seu franchisie predicte per dictos majorem et consules amoveri, et pignora et res eorum captas et jam explectatas et venditas occasione taillie antedicte eisdem liberari et reddi vel precia eorumdem.

Predicte majore, consulibus et rectoribus in contrarium se opponentibus et petitionem dictorum clericorum dicentibus per plures rationes non fieri nec concedi debere, cum procurando quod dicta manu regia amoveretur de consulatu predicto, ipsi utilitatem communem dicti loci procuraverint, et aliqui de clericis ipsis, quandoque consules fuerint et rectores dicti loci et ipsi utantur libertatibus et franchisiis dicti loci, sintque et fuerint ipsi major, consules et rectores in quasi possessione tailliandi possessiones immobiles eorumdem conquerentium pro communibus omnibus dicte ville, tanto tempore quod sufficit ad bonam saisinam acquirendam. Et demum curia nostra mandaverit et commiserit certis commissariis a nostra curia deputatis ut ipsi super articulis curie nostre traditis per dictum Remondum Bruni pro se et predictis clericis clericaliter, ut dicitur, viventibus et dictis commissariis sub contra sigillo nostro missis, et super aliis eisdem comissariis tradendis per majorem et consules dicte civitatis et ville Petragoricensis, inquirerent cum diligentia veritatem, vocatis qui forent evocandi.

Qui commissarii super articulis dictorum clericorum eisdem a curia nostra missis et super deffensionibus dictorum majoris, et consulum eisdem in scriptis traditis processerunt et inquestam super hiis completam curie nostre judicandam cum dictis partibus remiserunt.

Auditis igitur in curia nostra super hoc dictis partibus et visa diliginter inquesta predicta, per judicium curie nostre dictum fuit predictum Remondum Bruni et alios clericos supra nominatos tanquam clericaliter viventes debere teneri et defendi in possessione seu saisina libertatis seu franchisie non contribuendi in tallia seu collecta predicta, de qua predicti major et consules molestabant eosdem, et impedimentum predictum dictis clericis in sua possessione dicte libertatis per dictos majorem et consules appositum debere amoveri, necnon et quod pignora et res eorum capte et jam explectate et vendite occasione taillie antedicte eisdem et plenum deliberabuntur et reddentur vel precia eorumdem, exceptis tamen Ademaro et Guidone Giraudi quibus dicta pignora sua capta propter hoc non reddentur, cum non sint clericaliter viventes, prout apparet ex processu predicto.

Datum VII. die augusti, magister Rogerius de Turonis reportavit." »

<< Retour