<<Retour

Archives Municipales de Périgueux     E dep 5021 –

Registre des Comptes du consulat de Périgueux - Série CC

CC 52 : Année 1332 – 1333 Registre in 4^o, 31 feuillets, papier

Dépenses de l’année (folios 2r – 17 r) – occitan ; scribe : le comptable Itier de Chatuel

folio 2r

Remenbransa sia que ayssò es lo papiers en qué es lo comtes de la viela, de las prezas e de las baylas, escrieutas del temps que foren creat e fach cossol ses mayor aquist qui s’enseguen.

Steve de Salas  –  Arnaut de Margòt  –  Maytre Aymeric Comte  –  Maytre B. Ortic  –  Maytre Helias Bru, qui [a lo] sayel del rey  –  Helias de Barri  –  R. de Cortés  –  Helias de Taurel  –  Guilhem de Bru  –  Maytre G. Faure.

E foren fach e creat lo digmenc après la Sen Martí d’ivern en l’an M CCC XXXII. E fo comtadres Itier de Chatuel, contracomtadres Helias de Barri cossol.

folio 2v

Ayssò son las baylas que avem bayladas per la juridiccio del cossolat.

Baylem, lo digmenc que foren fach li cossol, en glueys :  XX d.

Item baylem a P. Mercier, per I^a acta qui fo aguda de la cort del seneschalc per la remissio de Helias de Charrada e de Helias Polazauda qui renuncieren a lor appel :  XVIII d. tornés.

Item baylem en VII cobdes d’eschaquat qui foren donat al Borrelier :  XXI s. tornés.

Item donem a P. Bru, sirven del rey, per citar a la assisa del rey Fronssó del Pi e B. Merle, sirvens del comte e de chapitre, qui avian penhorat P. Borrel en nòstre poder :  II s. VI d.

Item baylem en las raubas deus sirvens del cossolat :  XXIIII ll. X s. tornés.

Item baylem, per III cobdes e dimiey de vert qui falhian a la guonela de Fayó, e de l’eschaquat :  XXXI s. VI d. pergozís.

Item baylem aus sirvens de la viela, per I layró qui fo fòrsjurat e al qual ostet òm l’aurelha[1], qui a nom G. del Chastanh, dich de Bolazac, qui panava las morralhas e los verrolhs de las pòrtas e daus òrtz : V s.

Ayssò aguen li sirven a Nadal :

A Vidal :  V s.  –  A Johan de Manha :  V s.  –  A Migó de La Branda :  V s.  –  A G. lo trompador :  V s.  –  Helias de Las Combas :  X s.  –  Avinhós :  V s.  –  Robí de Gualhart :  V s., e  foren li rebatut per V s. que devia al comtador quart fo pres am una femna. –  Hugonet de Chatuel :  X s.  –  Aymeric de Sudor :  X s.  –  Arnaut d’Apzac :  V s., e sa molher pres lo, que el era a París.  –  Lo Borreliers :  V s.  –  Guilhem de la Faya, quar es toriers :  X s.

Item baylem, qui foren donat a I messatgier de Sarlat qui venc en esta viela, la vespra de l’an nuòu, am letras que portava deus cossols de Sarlat per aver cosselh del fach del subsidi :  V s.

Item baylem a Huguet l’albarestier a Nadal per son salari :  XXX s.

Soma :  XXXIX ll. XVI s.  III d. pergozís.

folio 3r

Item baylem a Fayó torier sobre son salari, quar te las claus de la tor, la vespra de l’an nuòu :  X s.

Item ac mays Fayó, lo digmenc de Kasimodo, per comandamen deus cossols :  X s.

Item baylem a Fayó, per pa aus preygoniers, entre V vetz :  VI s.

Item baylem a Fayó, per pa aus preygoniers :  XII d.

Item baylem aus sirvens de cossolat, per I layró qui fo pendutz la vespra de la Pifania, qui avia nom W. Aurelhenx y era d’Antona, amb aquò que coleren las còrdas :  XI s.

Item baylem a I faure qui adobet la clavadura de l’uych de la tor :  VIII d.

Item baylem a R. Manen [nota]ri per esturmens que fetz a la viela, e sò per mandamen de W. de Bru cossol [trou de ver] fetz son dich, e de Helias de Barri, e fo lo jorn de la Sent Alari :  XX s. tornés.

Item baylem a Fayó torier, que avia manlevat a I guarssó qui estet en la tor III jorns :  VI d.

Item baylem, qui foren donadas a I messatge que Mossen Phelip de Graló nos tramés am I^a letra clauza que no tramezessam ges a Cahortz pel fach del subsidi :  XII mealhas d’argen.

Item baylem a Johan Faure de Talhafer, per tapas e per clavaduras  que mes al cossolat :   XV d.

Item baylem a Hugonet de Chatuel, que R. de Cortés li promés, que anès ves lo còrs de Maystre Vidal[2] que aportava hòm : XII d.

Item baylem a P. Bru, sirven del rey, per citar las pestoressas que dizia òm qui s’eran apeladas a la assisa qui fo lo dissabde après la Chandelor :  V s. pergozís.

 Item baylem a N’Helias Vigier, qui foren mandadas de son comandamen en l’obrador de Silvestre, per la renda que lo comte a sul cossolat, del terme de Nadal :  XIX ll., e XX s., que fet mandar a·N Steve de Salas, soma :  XX ll., de las qualas XX ll. lo dichs Helias Vigier donet memòri que receub Helias de Peschier de portar guarentia del comte.

Item baylem, en I^a ma de papier que Helias de Taurel portet al cossolat :  XVI d.

Item baylem a Steve de Sudor, per I^a letra del rey que fetz d’un hòme qui a nom P. de Pomel, qui fo condemnatz en X ll. III s. el temps deus autres cossols.

Item baylem maych a II sirvens de l’egsequdor qui fey penhoreren lo dich P. de Pomel :  XXI d.

Soma :  XXIIII ll.  II s.  VI d. pergozís.

folio 3v

Item baylem a P. Mercier, qui anet am Steve de Salas e am B. Ortic e am Helias de Barri, lo jorn de la Sen Matiàs, veyre los decz, per lo logier del rossí que menet :  II s.

Item baylem a Helias Blanquet, per mecios de letras que fetz contra P. Faure e de Aymar d’Albiró :  VIII s. pergozís.

Item baylem a Robí de Gualhart, que·lh portet Fayós, quant fo naffratz per Arnaut Tardieu, que·lh feyren donar li cossol :  V s.

Item baylem a M^e G. Faure, que avia manlevat en despessa quant feyren el e P. de Verviela e M^e Helias Bru las premieyras deffessas de la cauza del procurador del rey, e reguarderen las letras :  VI s. tornés.

Item baylem maych, que avia manlevat M^e Helias Bru en la despessa desús dicha :  XII d.

Item baylem aus sirvens, per I hòme qui fo corregut, qui avia nom B. Pobolòtz, marit de Coratgona, e fo pres en avolteri ‘am I^a femna’ la vespra de la Senta Maria Chasta :  V s.

Item baylem a Fayó torier per pa aus preygoniers :  VI d.

Ayssò aguen li sirven a Pasques :

Vidals :  V s.  –  Johan de Manha :  V s.  –  Aymeric de La Branda :  V s.  –  G. lo trompador :  V s.  –  Arnaut d’Apzac :  V s.  –  Avinhós :  V s.  –  Hugonet de Chatuel :   X s.  –  A Fayó, quar es toriers :  X s. –  Aymeric de Sudor :  X s.  –  Helias de Las Combas :  X s.  –  Robí de Gualhart :  V s.

Item baylem a Helias de Guarlandier, per alear lo pes del pa, de XII s. tornés que·n demandava, e foren li rebatut V s., per aquò que donet al viatge de París :  VII s. tornés.

Item baylem a Fayó torier per pa aus preygoniers, entre II vetz :  XVI d.

Soma :  C XIII s.  I d.

folio 4r 

Item baylem a Nicholau Lo Sartre de París, que Arnaut d’Apzac pres, sirvens del cossolat, pres deus deniers que tramezem a París peus rossís :  V s. tornés.

Item baylem aus sirvens, per penhorar aquels qui devian de las assessas :  II s. VI d.

Item baylem en IIII mas de papier, e las doas mas foren mezas a aquest comte e al contracomte, e las II mas foren mezas al cossolat :  VI s. VIII d.

Item baylem, en I^a acta deus hòmes de La Guarda e de Colomnhés :  XII d.

Item baylem a Robí de Gualhart, qui era toriers tant quant Fayós estet a París, per pa a preygoniers :  XII d.

Item baylem a P. Mercier, per I^a acta que ac de la assisa del seneschalc per Hugueta, qui se era apelada a la dicha assisa, e ac lo dich P. acta de remissio :  XII d.

Item baylem a R. de Bernardó, per II caychas que fetz, la una en qué foren portadas las letras e li privilegi a París, e l’autra en qué portet òm la espaza e·l costel a París : V s. V d.

Item baylem a I messatgier de la chambra deus comtes de París, qui·lh foren donat :  V s. tornés.

Item baylem aus sirvens, per I^a femna qui fo correguda e banida a I an, per linsòls que avia panat a P. Uelh-de-buòu, de Sent Alari, la vespra de Roazórs :  V s.

Item baylem a Robí de Gualhart torier, per pa a preygoniers :  XII d.

Item baylem aus sirvens per I^a femna qui fo correguda lo diguòus apròp la Panthacòsta : V s.

Item baylem a Mossen G. de Bòrn, per I^a letra qui contenia II s. de renda de Arnaut de Rayne :  II s VI d.

Soma :  XLIII s.  VIII d.  pergozís.

folio 4v

Item baylem, en I mandamen qui fo enpetratz a la assisa qui fo avans la Sen Bernabè, del fach deus hòmes de la Guarda del Calhaut :  XVI d.

Item baylem a Arnaut d’Apzac e a la guarda de la viela e a II hòmes qui aneren am lor e penhoreren W. de La Rossia e Helias Chavaugó, e aporteren huych e sistós e autres guatges :  XX d.

Item baylem a B. Lo Clavier, clerc de la cort de l’official, per I procès que fetz am P. Faure Lo Justier del fach de la charitat :  V s.

Item baylem a P. de Verviela, per los sayels de V letras saelar de sayel del rey, del fach de las acessas :  VI s. tornés. 

Ayssò a costat la festa de Sen Johan :

Al Rey del Pon :  X s.  –  A l’Enpeyrador :  X s.  –  Al Duc :  X s.  –  Al Marqués :  V s.  –  A l’Abat :  V s.

Item baylem per adobar la fon de la Clautra de fusta a portar e a tornar, e en autres menutz costz :  VII s. VI d.  –  Item en guarlandas e en raus :  V s. II d.

Ayssò aguen li sirven a la Sen Johan :

Johan de Manha :  V s.  –  Robí de Gualhart, quar es toriers :  X s.  –  Hugó de Chatuel :   X s.  –  Aymeric de Sudor :  X s.  –  Vidals :  V s.  –  Arnaut d’Apzac :  V s.  –  Aymeric de La Branda :  V s.  .  –  Avinhós :  V s.   –  G. lo trompadres :  V s  –  Helias de Las Combas :  X s. 

Soma :  VI ll.  XVIII s.  I d.  pergozís.

folio 5r

Item baylem aus sirvens de la viela, per I^a femna de la Ciptat, molher de Helias Petit, qui fo correguda lo dimartz avans la quinzena de la Magdalena :  V s.

Item baylem aus sirvens de la viela, per I^a excequcio que feyren d’un hòme qui avia nom Calhó, qui era espitaliers de l’espital Sen Silà, qui fo charreat[3] e pendutz per los murtres que avia fachs e per I^a femna que avia mòrta, lo divenres apròp la Sen Marsal :  X s.

Item baylem aus sirvens de la viela, per I^a excequcio que feyren d’un hòme qui avia nom Johan de Sen Perdolf de La Ribieyra, qui era layre e avia panat tròp de chauzas e fo pendutz, lo dissabde avans la Magdalenan :  X s.

Item baylem a Avinhó lo trompador, qui fetz adobar un mal pas qui era en la plancha del prat evesqual, lo dimartz avans la Magdalena :  XII d.

Item baylem a Robí de Gualhart torier, per pa a preygoniers, e especialmen a I qui a nom Moret, qui fo pres per l’effan del Solier :  II s. II d.

Item baylem a Avinhó, per pa aus preygoniers tant quant tenc las claus de cossolat :  VIII d.

Item baylem a Salseyró lo sirven del rey, qui avia manlevat quant anet a Sen Gòrgi am los sirvens de la viela, que li chanonge hi volian tener assisa :  III s. IX d.

Item baylem a un massip qui aportet la letra del rey pel fach de la crozada[4] de Caortz :  V s.

Soma :  XXXVII s.  VII d.  pergozís.

folio 5v

Item baylem a P. Mercier e a Helias Boní, li qual prendian lo comte deus pezadors de III senmanas que foren en debat las bóstias quant foren acessadas, V s. tornés a chascú per senmana, monta :  XXX s. tornés.

Item baylem a B. Faure e a P. de Las Coutz e a W. del Boyhs e a G. de Guaudí, per III senmanas que tenguen lo comte del pes de las bóstias, a chascú V s. la senmana, monta : LX s. pergozís.

Item baylem, qui fo rebatut a Helias Seguí de las tres senmanas de la acessa de las bóstias que esteren en debat, e montet lo comtes de sos pezadors maych que daus nòstres : VI s.  X d. pergozís.

Item baylem a P. Ròqua e a Steve Braudet procuradors del comte, per la renda del terme de la Sen Johan que deu òm al comte, e estay ne quarta que fetz M^e P. La Chapela :  XX ll. pergozís.

Item baylem, que coleren las dichas XX ll. pergozís de chamnhe, que covenc que baylessam la una partida en mealhas d’argen :  IIII s. pergozís.

Item baylem aus trepadors qui treperen a la Sen Memòri per sablar la charrieyra :  XXX s. tornés.

Item baylem aus sirvens e al Borrelier, per I^a excequcio que feyren, l’endemà de la Senta Maria d’aost, de Helias del Solier, d’Azerac, qui fo pendutz :  X s.

Item baylem, a las còrdas am qué fo pendutz :  XVI d.

Item baylem, en la mermansa que arsen las ‘VI’ tòrchas dels al guach de la nuòch de la Sen Fron :  XVIII s. V d. pergozís.

Item baylem, per l’esturmen qui fo fach de las XX ll. qui foren pagadas per la ma Helias Seguí a P. Ròca e Steve Braudet, procuradors del comte, per nom del comte de la renda qui·lh fo deguda a la Sen Johan :  XX d.

Item baylem, per I^a enformacio que fetz M^e R. Martí, comissari del seneschalc, per la enformacio de Johan Paschier, qui avia rescós I hòme que li sirven de la viela avian pres, e·l seneschac redet lo nos am conoyschensa de cauza : V s. V d.

Soma :  XXIX ll.  II s.  VIII d.  pergozís.

folio 6r

Item baylem a Helias de Jaucelm, filh de Helias, qui·lh foren rebatudas de sa acessa per quartas e per enformacio e per procès que a fach al cossolat, qui·lh foren taxadas per G. Faure cossol, a cuy li autre cossol o comezen :  VII ll. pergozís.

Ayssò aguen li sirven del cossolat a la Totz Sanchs :

Vidals :  V s.  –  Arnaut d’Apzac :  V s.  –  Johan de Manha :  V s.  –  Hugó de Chatuel :   X s.  –  Aymeric de La Branda :  V s.  –  Aymeric de Sudor :  X s.   –  G. lo trompador :  V s  –  Avinhós :  V s.  –  Helias de Las Combas :  X s.   

Item baylem a Huguet l’albarestier, de sò que òm li deu del terme de la Sen Johan :  V s. pergozís.

Item baylem a Aymeric de Peyrós faure, per I rossí qui fo comprat de luy per charrear l’espitalier de Sen Silà, qui foren perdut per la menhs valor del rossí :  XXVIII s. pergozís.

Item baylem aus sirvens qui velheren al portal de Mataguerra :  V s.

Item baylem, al pon de l’Agulharia adobar, per la ma de Helias Boní :  VI s.

Item baylem a Lambert de Gordó, per còrdas e per singlas e per peytral a l’espitalier de Sen Silà quant fo pendutz e charreyat :  VI s.

Item baylem maychs al dich Lambert, per còrdas que ac òm per lo messatge qui solia estar am Helias d’Agonac, qui fo pendutz :  XX d.

Item baylem aus sirvens, lo digmenc que fetz hòm los cossols noels, per lor despessa que esteren tot lo jorn al cossolat :  V s.

Item baylem, en I^a tapa e en II verrolhs qui foren mes en las pòrtas de las Bladarias, per la ma de Bernòt R. :  III s.

Item baylem, en l’esturmen qui fo fach de la appellacio que feyren las pestoressas, los quals baylet Steve del Puey :  VI s.

Item baylem, qui foren donat aus Frayres Menors e aus Frayres Prezicadors, per I^a reffeccio a chascú coven, qui se monta a chascú XL s., li qual foren baylat per la ma Helias Boní :  IIII ll. pergozís.

Soma :  XVIII ll.  XX d.  pergozís.

folio 8r (6v, 7r, 7v blancs) note postérieure : Ce qu’ont couté les voyage faits pour les affaires de la ville)

Ayssò qui s’ensec avem baylat en viatges que òm a fach defòra peus negòssis de la viela a París e alhors.

Baylem, lo dissabde après la Senta Katerina, qui foren tramés a M^e Vidal Beraut e a Itier de Pasquaut a París, e portet los Arnaut d’Apzac sirvens del cossolat :  XXV reyals d’aur, e costava la pessa  XVI s. II d. tornés.

Item baylem en unas sabatas al dich Arnaut d’Apzac :  V s. VI d.

Item baylem a W. de Bru cossol, qui anet a Lemòtges lo jorn de la Senta Lucia, que li cossol li tramezen a M^e Vidal Beraut, qui se·n venia de París e aremàs aquí malaptes de la malaptia de qué murit, per far aportar lo dich M^e Vidal, e per pagar sos metges, e per far sa lestieyra, e per far son taüch, e per pagar alcunas chauzas que lo dich M^e Vidals devia e avia manlevat lay : XV ll. tornés, en mealhas blanches e en valoys, qui colavan VI d. per ll.  ‘Item baylem pel chamnhe de las XV ll. desús dichas : VII s. VI d. tornés.’[5]

Item baylem a Itier de Bironseyla, per I rocí que W. de Bru menet a Lemòtges, lo quals rocís aportet M^e Vidal en la lestieyra[6] mòrt, e afolet se en l’aportar lo còrs, e per l’afòl e per lo logier fo ordenat peus maneschalsz e peus cossols que lo dich Itier n’agués, lo quals ac per mandamen Helias de Barri :  XL s. pergozís.

Item baylem a P. Mercier e a P. de Verviela, qui aneren a la assisa de Marsanés del comte e de chapitre per deffendre los hòmes qui eran citat, li qual hòmes son de nòstre poder :  X s. tornés.

Item baylem maych a W. de Bru, que·lh taxeren li cossol de V jorns que estet quant anet a Lemòtges per far aportar M^e Vidal Beraut, e fo baylat per lo comandamen de Helias de Barri :  XXV s. tornés.

Item baylem a R. Pòrta filh d’En Lambert, per I rocí que Mossen Helias de Grosset menet a París, e quant M^e Vidals Berautz se partit de París pres lo rocí e loget lo del dich Mossen Helias XX d. lo jorn, e tenc lo tant el chamí qu’el l’aportet mòrt, e montet se lo logier que n’ac e fo baylat per comandamen de Helias de Barri :  XLV s.

Item baylem a P. Mercier e a P. de Verviela, qui aneren a la assisa de Marsanés del comte e de chapitre, qui fo l’endemà de la Piphania, per deffendre los hòmes qui eran citat, li qual hòme son de nòstre poder :  X s. tornés.

Item baylem a P. de Verviela, per II vetz que anet a Marsanés a la assisa del comte e de chapitre, per far esturmen peus hòmes d’Asturs, qui·lh fo taxat per son trabalh :  X s. tornés.

Soma :  LII ll.  VIII s.  X d.  pergozís.

folio 8v

Item baylem, al logier deus II rocís que Itier de Pasquaut amenet de París, lo dimartz avans la Sent Alari, e l’u daus II rocís chavauget Mossen Helias de Grosset al venir de París ensay, per razó que M^e Vidals Berautz amenet aquel del dich Mossen Helias quant se·n venc, e fo assomatz peus cossols que, per razó d’aquò que costeran de tornar e per la despessa del messatge a anar e a venir, fo ordenat de baylar X ll. tornés am lo logier de XXIIII jorns, e prendia lo jorn V s. de parizés.

Item baylem maych, que M^e Vidals e Itier de Pasquaut avian manlevat a París de lor òpte :  IIII ll. XV d. tornés.

Item baylem mayhs, en I costel que tramezem a París a Nicholau Lo Sartre, per las honors e per los servizis que avia fach a Itier de Pasquaut, procurador de la viela estan a París :  VII s. II d. tornés.

Item baylem a Arnaut d’Apzac, sirven de la viela, per sa despessa a anar e a venir e a estar lay VI jorns a París, qui portet totas aquestas chauzas desús escrieutas a París, e per aver respòsta d’alcunas letras clauzas que portet a nòstre cosselh a París :  XL s. tornés.

Item baylem maych en unas sabatas al dich Arnaut d’Apzac :  IIII s. V d. tornés.

Item baylem maych, que despenderen li II rocís que·l dichs Itier de Pasquaut amenet de París, en V jorns que esteren en Sent Alari a maygó Na Maynarda :  XIIII s. tornés.

Item baylem a Itier de Manha, filh de Na Bertranda de Manha, qui anet a París e portet letras clauzas per la viela aus nòstres avocatz e aus nòstres procuradors a París, e partit d’esta viela per anar a París lo dimart après la Conversio Sen Paul :  X s. tornés.

Item baylem a P. Mercier, qui·lh foren taxat per III vetz que anet a Marsanés a las assisas del comte, per son trabalh e per autras chauzas que y fetz :  XV s. tornés.

Soma :  XXIII ll.  IIII s.  IX d.  pergozís.

folio 9r

Item baylem a P. Mercier e a P. de Verviela, qui aneren am Johan La Guarda de la viela e am II sirvens a Marsanés a la assisa del comte e de chapitre, lo duguòus après la Conversio Sen Paul, per deffendre los hòmes qui eran citat, li qual hòme son de nòstre poder, e li avan dich P. Mercier e P. de Verviela eran hi estat davan per II vetz :  X s. tornés.

Item baylem a W. de Bru e a M^e G. Faure cossols, qui aneren al Mon de Dòma e d’aquí a Caortz e esteren VII jorns, pel fach del subsidi, e fo lo prumier dicmenc de Karesme, en la despessa que avian facha :  LVI s. tornés.

Item baylem maych a Arnaut d’Apzac, sirven del cossolat, qui anet am lor a pè :  V s.

Item baylem, al logier del rocí que menet M^e G. Faure al viatge desús dich : X s. tornés.

Item baylem a M^e G. Faure, per lo viatge desús dich, per VI jorns que estet, per son salari :  XXX s. tornés.

Item baylem a W. de Bru, per lo viatge desús dich, per VI jorns que estet, per son salari :  XXX s. tornés.

Item baylem maych a M^e Aymeric Comte, qui anet a Caortz pel fach del subcidi, lo dicmenc de Miey Karesme, per sa despessa e per VI jorns que estet :  L s. tornés.

Item baylem maych, en II rocís que menet lo dich M^e Aymeric Comte e son clerc a Caortz, qui eran de B. e de Johan de Chaumon, e tenc los VII jorns, e prendia lo rocí de Johan qui era mèlher que l’autre II s. tornés lo jorn, e l’autre II s. pergozís lo jorn, monta am la civada :  XXXIII s.

Item baylem maych a M^e Aymeric Comte, que pres W. Ferrò, clerc qui estay am luy, per son salari, lo dissabde avans Roazors : LXX s. tornés.

Soma :  XVIII ll.  X s.  VI d.  pergozís.

folio 9v

Item baylem a I massip de Maytre P. La Pòrta, qui anet am luy a París, a unas sabatas :      V s. III d.

Item baylem maych, a adobar las II selas de M^e P. La Pòrta, la bastarda e la soa, a Arnaut lo selier :  XIIII s. VI d.

Item baylem maych a Arnaut d’Apzac, sirven del cossolat, qui anet am M^e P. La Pòrta a París, per unas sabatas :  V s.

Item baylem maych a Arnaut d’Apzac, sirven del cossolat, lo jorn de la Senta Crotz de may, que anet a París e portet la espaza e·l costel : XX s. tornés.

Item baylem maych, al logier del rocí que Helias de Barri menet a París, qui era de Steve del Playschat, e estet XVIII jorns :  XXXVI s. tornés.

Item baylem a Helias de Barri, qui anet am M^e P. La Pòrta e am P. d’Alvera a París, lo dulús après Quasimodo, per far lor despens e per pagar IIII avocat e II procuradors, e per autras chauzas, e esteren VI^XX XIIII jorns :  VIII^XX ll. tornés.

Item baylem, per lo chamnhe de C ll. de las VIII^XX ll. desús dichas :  III ll. III s. IIII d. pergozís.

Item baylem maych a Helias de Barri a Paris, per la ma Helias Seguí :  XL ll. tornés.

Item baylem maych al dich Helias de Barri a Paris, per la ma del dich Helias Seguí :  XX reyals.

Item baylem maych al dich Helias de Barri, l’endemà de la Sen Bertholmio, que tramés òm a París, que lo dich Helias e M^e P. La Pòrta avian soysoubut d’un merchadier :  XXV reyals.

Item baylem, que donet òm al dich merchadier qui avia prestat los dichs XXV reyals, per sos interès :  III reyals.

Item baylem lo meych jorn al dich Helias de Barri, que portet a París Fayós e Aymeric de la Branda, a M^e Mayó, per los sayels dels arrestz :  XII ll. X s. tornés.

Soma :  XVIII ll.  X s.  VI d.  pergozís.

folio 10r

Item baylem a M^e Vidal Beraut, per lo darrier viatge que fetz a París per la viela, que pres en draps de Itier de Chatuel comtador, que anc avans no y vòlc anar : IX ll. tornés.

Item baylem maych, per M^e Vidal quant fo aportatz mòrtz, a la coffrayria de la Crotz e a la coffrayria de La Guarda per lor devers : XL s. pergozís.

Item baylem a Arnaut d’Apzac sirven de la viela per alcús viatges que fetz a París : XXII s.

Item baylem maych al dich Helias de Barri lo meyhs jorn, que tramés òm a París per Fayó, que lo dich Helias e M^e P. La Pòrta avian soysoubut de lor òpta :  L s. tornés.

‘Item baylem maych lo meyhs jorn a Fayó e a Aymeric per lor despens, qui porteren a Paris las dichas somas per aportar ‘los [illisible]’:  L s. (‘…’ rajouté au-dessous dans l’interligne)

Item baylem maych lo dich meych jorn a Fayó e a Aymeric de La Branda per II parelhs de sabatas :  VIII s. tornés.

Item baylem per lo chamnhe de las monedas desús dichas :  XVIII s. tornés.

Item baylem lo meych jorn desús dich a Fayó sobre son salari, los quals li fetz baylar Helias de Barri :  XXXII s. tornés.

Item baylem maych, qui foren tramezas a Figac a M^e Huc Fabrefòrt, que M^e P. La Pòrta e Helias de Barri avian soysoubudas de luy a París :  L ll. tornés.

Item baylem, que perdet òm en LXVII reyals d’aur de la soma desús dicha que tramés òm a Figac al dich M^e Huc :  LXVI s. tornés.

Item baylem maych a Vidal lo sirven, qui portet la soma desús dicha a Figac al dich M^e Huc, per sos despens :  X s. tornés.

Item baylem maych en unas sabatas a uòps del dich Vidal :  V s. II d.

Item baylem a Steve del Playschat e a Rampnolf de Bodí e a P. de Brunet, qui aneren a París per mandament del rey quant mandet las communas, e partiren d’esta viela IX jorns avans la Sen Michel, quant lo rey am manchs d’autres barós pres la crotz, las quals aguen en reyals d’aur :  XL ll. tornés, de las quals XL ll. tornés se montet lo logiers de lor rocís e de lor massips IX ll. tornés que bayleren de la dicha soma ; item bayleren maych de la dicha soma C s. tornés en letras e en autras chauzas que bayleren a París, am XXX s. de p[ari]zés que bayleren a Fayó, e·l remanen de la soma desús dicha despenderen am lors rocís e am lor massips en XXIIII jorns que esteren el viatge desús dich.

Item baylem, que perdet òm el chamnhe deus reyals, qui costeren mayhs que ilh no los prezen :  L s. tornés.

Item baylem maych per III parelhs de sabatas a uòps de III massips qui aneren am lor a París :  XII s. tornés.

Soma :  VII^XX e V ll.  XII s.  II d.  pergozís.

folio 10v

Item baylem, que perdet òm en LX ll. tornés que baylet W. del Puey en parizés d’aur : C. e X s. tornés.

Item baylem a Helias de Barri cossol, qui anet a París am M^e P. La Pòrta per lo plach que la viela avia am lo comte e am lo chapitre e am lo procurador de rey, e estet VI^XX e XIIII jorns, e prendia X s. pergozís lo jorn per si e per son rocí e per son messatge, sals que li cossol li devian baylar rocí a anar tròs que a París, lo quals li fo baylatz e fo pagat a Steve del Playschat ayschí com es contengut al comte de luy davan escrieut, nos li pagem que se montavan li VI^XX e XIIII jorn :  LXVII ll. pergozís.

Item baylem a M^e P. La Pòrta de Talhaffer, qui anet a París per la viela, e partit d’esta viela lo dulús apròp Quasimodo, per lo plach que la viela avia am lo procurador del rey e am lo comte e am lo chapitre, e estet VI^XX e XIIII jorns, e prendia lo jorn XX s. tornés e sos despens, e per III assisas que perdet luy estan a París, qui·lh foren mezas a X ll. de tornés, e per lo logier d’un rocí que sos clercz chavauget, qui portava los procès e las letras de la viela, e per LX s. tornés qui foren taxat al dich seu clerc, e per XX s. tornés qui foren taxat a son messatge, e per sobregran trabalh que traych a París en escriptura e en autras chauzas, ac lo dich M^e P. VII^XX XVII ll. e XIII s. de tornés, am XI ll. tornés las quals pres a París de Helias de Barri, resta que a agut per la ma del comtador : VII^XX e VI ll. e XIII s. de tornés.

Item baylem a W. del Puey, per lo chamnhe de XX ll. de mealhas blanchas que M^e P. La Pòrta e Helias de Barri porteren a París, los quals ac per la ma Helias Boní :  XL s. tornés.

Soma :  II^CC  LIX ll.  XIII s.  IX d.  pergozís.

folio 11r

Ayssò avem baylat en plachz que la viela avia.

Item baylem, a la assisa qui fo lo dissabde qui fo après la Chandelor, a M^e P. La Pòrta lo Jove e a M^e P. la Pòrta de Talhafer e a M^e Itier del Chastanet, en mealhas d’argent :  LX s. tornés.

Item baylem maych, a la assisa desús dicha, per enregistrar la salvaguarda[7] e de II a[ctas] deus hòmes de Colomnhés :  VII s. tornés.

Soma :  IIII ll.  III s.  IX d.  pergozís.

folio 12r (11v blanc)

Ayssò qui s’ensec am colat las doas charitatz del bacò e de la Panthacòsta.

Item baylem en la charitat del bacó, entre menutz costz e totz despens :  LXXVI ll.

Item baylem en la charitat de la Panthacòsta,  e entre menutz costz e totz despens : VI^XX e XI ll..

Soma :  II^CC e VII ll.  pergozís.

folio 13r (12v blanc)

Ayssò avem baylat en prezens e en servizis.

Item baylem, a la assisa qui comenset lo dissabde après la Senta Katerina, en I prezen qui fo fach a Mossen Phelip de Greyló d’un sestier de sivada e de VI conilhs e de VI perditz :  XLII s. II d.

Item baylem, en I prezen qui fo fachs al procurador del rey de XII ll. de cera, a la assisa desús dicha :  XXXIII s.

Item baylem, en I diapre e en la mermansa de VI tòrchas de cera, qui fo mes e donat sobre M^e Vidal Beraut quant fo sebelhitz, lo divenres avans Nadal :  VI ll. tornés.

Item baylem, en I prezen qui fo donatz al comte quant fetz sa intrada en esta viela e venc tener festa que era estatz chavaliers noels a Nadal en esta viela, en XII tòrchas de cera, chascuna de IIII ll., e en VIII ll. de doblós, e en XI ll. d’especis coffitz, e en I barriel de pimen, e en autre de vi :  XIII ll. V s. pergozís.

Item baylem maych, aus II barriels en qué portet òm lo prezen del comte, qui foren perdut que anc no los pòc òm aver, am IX d. que n’aguen li hòme qui porteren lo prezen :  VIII s. IX d.

Item baylem, en I prezen qui fo fachs al procurador del rey, quant la viela era en sentensa, de vi e de I chabrit :  VI s. VI d.

Item baylem, en I prezen qui fo fachs al seneschalc, a la assisa qui comenset lo dissabde après la Chandelor, en VI conilhz, en XII perditz e en III sestiers de vi, a VIII s. lo sestier, e en logier d’urzilha qui·lh fo prestada :  LII s. III d.

Item baylem, en I prezen qui fo fachz a Mossen Phelip, a la assisa desús dicha, d’un sestier de sivada :  XXVI s.

Item baylem, en I prezen qui fo fach al procurador del rey, a la assisa desús dicha, d’un sestier de sivada :  XXIIII s.

Item baylem, en I prezen qui fo fach d’especis coffitz al chantor de la Ciptat, per alcunas chauzas que avia fachas pel cossolat :  XX s.

.

Soma :  XXXV ll.  II s.  VIII d.  pergozís.

folio 13v 

Item baylem, en I prezen qui fo fach a la assisa qui comenset lo dissabde apròp Quasimodo, al seneschalc de I barriel de vi e de IIII chabritz :  XXXI s. V d.

Item baylem, en I prezen qui fo fachz a la assisa desús dicha a Mossen Phelip, de I sestier de sivada :  XXVI s.

Item baylem, en la espaza e al costel qui fo tramés a París, am I marc d’argen qui intret am lo daurar, e am las costelieyras qui costeren XVIII s. tornés, e en autras fayssós :  IX ll. e X[..] s. tornés.

Item baylem, en I prezen d’un sestier de sivada qui fo donatz a Mossen de Sen Germà, jutge del rey, a la assisa qui fo a la Sen Laurens :  XXVI s. VIII d.

Item baylem, en I prezen qui fo fachs al seneschalc, a la assisa qui fo lo dissabde après la Sen Michel, de I barriel de vi vielh e de I sestier de sivada :  LIII s.

Item baylem, en I prezen qui fo fachz a Mossen Phelip, a la assisa desús dicha, d’un sestier de sivada :  XXVIII s.

Item baylem, en I^a eymina de sivada que fo donada a M^e R. de Dyosidó, procurador del rey, a la assisa desús dicha :   XII s. VI d.

Soma :  XXI ll.  XVI d.  pergozís.

folio 15r (14r, v blancs)(note postérieure : Ce que on a donné pour les réparations)

Ayssò qui s’ensec avem baylat en òbras de la viela.

Baylem tot primieyramen a M^e P. Lo Picart e a dos companhós peyriers am d’autra manòbra, qui esteren III jorns a adobar la tor del cossolat, e en IIII saumadas de chaus qui feyren mestier :  XLIIII s. V d.

Item baylem mayhs a recubrir lo cossolat, entre clavels e latas e·l jornal del recubridor e en dimiey cent de teule, e II d. que n’ac una femna qui portet l’ayga :  V s. VI d.

Item baylem mayhs en II cents e dimiey de teule qui fo mes sobre las Panatarias e·l corredor ayschí com òm intra al cossolat, e fo quant Charradó se n’anet :  X s.

Item baylem maych al recubridor e a latas e a clavels :  II s. VI d.

Item baylem a VII hòmes qui foren el prat de la viela per ostar las ronzes :  V s. III d.

Item baylem, en adobar lo portal de Mataguerra, e de claure la pòrta a murs secz e de far las artz :  IIII ll. IIII s. IIII d., fach comte am Helias de Barri qui era prezens.

Item baylem en II traus a aponre lo solier de la chambra del cossolat, e a Pinssó qui o adobet, lo divenres apròp la Sen Bertolmieu, sò es assaber VIII s. VI d. aus traus, e a Pinssó II s., soma :  X s. VI d.

Item baylem a las còrdas del pes de l’Albergaria que foren fachas nuòvas :  IX s.

Item baylem al faure del Puey Roy, qui adobet las XXXVI ll. del pes de la Agulharia :  III s.

Item baylem a Helias Boní, per tapas de fer qui foren messas en l’espillòri, e per far adobar :  VII s.

Item baylem a Johan Faure de Talhafer, per la òbra que fetz en la clarieyra del fons de la tor del cossolat, en plom e en las barras de fer que y mes :  XII s; VI d.

Item baylem, per recubrir las Bladarias, li qual foren baylat per la ma Helias Boní :  VII s.

Soma :  X ll.  XII d.  pergozís.

folio 16r (15v blanc)(note postérieure : Ce qu’on a payé pour ceux qui furent cités à Paris)

Ayssò que s’ensec avem pagat a aquels qui foren citat a París en l’an avan, e a d’autres a cuy la viela devia.

Pagem a G. Noel, per los quals quitet sò que la viela li devia e·lh podia dever d’aquel viatge, e fo fach per lo comandamen Helias de Barri :  LX s. pergozís.

Item pagem a Itier de Pasquaut, pel segon viatge que fetz antan am M^e Vidal a París, que avian y jorn al parlamen de Vermandoys am lo comte e am lo e am lo procurador del rey, e porteren los previlegis de la viela e las letras, las quals redet lo dich Itiers aus cossols tanleu com fo vengutz, :   XVII ll. XVII s. tornés.

E de la soma que lo viatges se montava maych, lo dich ‘Itier’ era se pagat deus deniers qui·lh sobreren de la viela que li avi’òm baylat quant anet, e en autras chauzas, soma que es[8] estat pagat lo dich Itiers de tot lo viatge.

Item pagem a Helias de Taurel, pel viatge que fetz a París quant fo citat a la estansa del procurador del rey e del comte e de chapitre per enchaigó de cossolat, e letra que n’avia, la qual letra cobrem, e fo cancellada e remàs sunla taula del cossolat :  X ll. tornés.

Item pagem a Helias e a W. Seguí frayres, que la viela lor devia, e avian ne letra que cobrem :  XX ll. tornés.

Item pagem maych al dichs Helias a W. de Seguí, per I^a pessa de mesclat, la quals lor fo preza al temps de Mossen Litgier, e fo venduda a l’enquan, e enformeren no·n[9] [soss…em] am enformacio qui se·n fetz, e fo venduda, las quals lor foren pagadas :  XII ll. tornés.

Item pagem a W. del Puey, que avia prestat l’an avan a la viela :  X ll. tornés.

Item pagem a Steve del Puey, pel viatge que fetz a París quant fo citat a la estansa del procurador del rey e del comte e de chapitre per enchaigó de cossolat, e avia ne letra seylada del cossolat, e cobrem la :  X ll. tornés.

Item pagem a Johan Faure de Talhafer, pel viatge que fetz a París quant fo citat a la estansa del procurador del rey e del comte e de chapitre per enchaigó de cossolat, e avia ne letra seylada del cossolat, e cobrem la :  VIII ll. pergozís.

Item pagem a P. Faure lo Justier, per deptes que la viela li devia, fach comte am luy de totas chauzas que la viela li pagués dever de temps passat en XV ll. pergozís, e per aytant quitet en la prezensa deus cossols d’aquest an e de P. de Verviela notari, de la qual soma desús dicha ac :  XIII ll. pergozís.

(pas de somme de bas de page)

folio 16v

Item pagem a la molher qui fo de Steve de Maystre Johan VI ll. de pergozís, que·lh devia hòm de prest que avia fach a la viela al temps que maystre P. La Pòrta lo Jove era màyer, en qué eren obligat Helias Nadal e Arnaut de Longayró, W. [Banieyri], P. Chalups, Rampnolf del Pòrt e Helias de Puey Arre de Sen Martí, e cobrem las letras del depte e la letra de la fiansa.

Soma tot aquest fuelh dedins e defòra :  VI^XX e IX ll.  e XVI s.  III d. 

folio 17r (note postérieure : Ce qu’on a donné aux officiers de la ville)

Ayssò son las taxacios que an fach li cossol aus officials de la viela e a d’autres.

Item baylem a M^e R. de Bru jutge del cossolat, per sa jutgaria de tot l’an : XXXVII ll. e X s. pergozís.

Item pagem a Itier de Chatuel, qui·lh foren taxadas peus cossols per CL ll. que prestet tot l’an a la viela, de la qual soma de la una partida compret òm pòrcz a la charitat del bacó, en qué guanhet la viela XX ll. o mayhs, e per autra prestas que nos fetz en menutz còstz tot l’an :  XXV ll. pergozís.

Item pagem maych al dich Itier de Chatuel, quar era comtadres e tenia lo comte de la viela, per son salari :  X ll. pergozís.

Item pagem a Helias Boní, qui·lh foren taxadas peus cossols :  XVII ll. e X s. pergozís, sò es assaber X ll. tornés per la charitat de la Panthacòsta, e C s. pergozís per trabalhs que a fach per la viela tot l’an en fazen los officis de la viela.

Item pagem a P. Mercier per la procuracio, quar es procuradres generals de la viela, qui·lh foren taxadas peus cossols :  XV ll. pergozís.

Item pagem a P. de Verviela notari, per la escriptura que a fach en la chambra del cossolat desús per tot l’an, e per transcrieure los comtes :  XX ll. pergozís.

Item pagem a Helias Seguí, per lo guanh de III^C e L ll. que nos avia prestadas a la anadas de París en diversas parcialhas :  XX ll. pergozís.

Soma :  VII^XX e V ll.  pergozís.

folios 17v à 26r manquent. Ensuite cahier tête bêche, numérotation à l’envers.

folio 31r (31v blanc) note pos.t :  Trente et unième et dernier feuillet   M. H.

folio 30v

Ayssò qui s’ensec avem receubut del faymidrech de cossolat

Item aguem de la filha qui fo Arnaudó de Tiviers de Sen Martí, , qui fo trobada en avolteri am Hel. de Guionet e am W. Boyer, e foren trobat tuch trey en I liech essems, e aguem de totz :  IX lb. III d., e d’ayssò ac Hel. de Las Combas sirven qui los trobet LX s., resta a la viela :  VI lb. III d.

Item aguem de N’Audí de Bazalha qui estay am los effans de Blanquet, per I^a esmenda :  XX s.

Item aguem de Hel. Martí laboradre, per I^a esmenda :  X s.

Item aguem deus deniers a Dieu qui foren pres a las acessas de la viela :  XII s. IX d.

Item aguem de Hel. Colhó lo Vielh per I^a trueya qui era esnarrada :  II s. VI d.

Item aguem de Polagauda, per I^a esmenda en qué fo condempnat :  X lb. tornés.

Item aguem de Hel. Jaufre apelat Paneyrier, per I^a esmenda en qué fo condempnat :  V s., e d’aquestz V s. ac Aymeric de Sudor XX d., resta a la viela :  III s. IIII d.

Item aguem de Maria de Costans, per I^a esmenda :  V s.

Item aguem de Lambert de Gordó, per I pòrc qui fo trobat e no avia senhor[10] : XX s.

Item aguem de B. de Marmoych, de las ischizós de XXIX pòrctz a XX d. chascú :  XLVIII s. IIII d.

Item aguem maych de B. de Marmoych II latz de pòrc qui foren mes a XVIII s.

Item aguem de Joh. de Jaudó mazelier, per las vendas d’una maygó que compret de Salsayró quis te am lo mur de la viela  :  X s. tornés, e d’ayssò ac Hel. Boní V s. tornés per son dever, resta a la viela :  V s. tornés.

Item aguem de P. Giraudó e de P. d’Albert X lb. pergozís qui resteren a pagar del cot de la acessa d’antan del temps deus autres cossols, sò es assaber de P. d’Albert L s. e de P. Giraudó VII lb. X s., e d’aquestas X lb. son a Itier de Chatuel VI lb. e II s., las quals avia manlevadas al comte d’autan maych que receubut, restan a la viela :  IIII lb. II s menhs pergozís.

Item aguem de P. ‘de’ Moyschat per I^a esmenda en qué fo condempnat :  LII s. pergozís.

Soma :  XXXI lb.  XV s.  V den.

folio 30r

Item aguem de Perrotí de Bonabocha sudre, filh de B., per I^a esmenda :  X s.

Item aguem de P. Rampnolf e de W. Salamó cossols de la Ciptat, peus viatges del fach del [subcidi] lo dissabde après la Sta Crotz de may :  XL s. tornés.

Item aguem deus arreyratges e de las vendas de l’òrt que W. Faure compret deus effans de [Verguias] qui·s entre lo Puey e la Ciptat :  LVII s. pergozís.

Item aguem de Hel. Còsta lo Jove de Colomnhés per I^a esmenda en qué fo condempnat, per la ma de W. de Jaudó lo Jove :  XLII s.

Item aguem de Hel. Marbòt de Sent Alari per I^a esmenda d’un bròc en qué fo condempnat, e d’Ayssò ac Joh. de Manha e Ar. d’Apzac sirvens X s. quar o aporteren, resta a la viela :  XX s.

Item aguem de Hel. [trou] filh de Ar. per I^a esmenda en qué fo condempnatz en l’an passat per los excès que fetz a Chimiric lo sirven de la viela, las quals ac P. de Vervila per son salari :  X. lb. tornés.

Item aguem de Ar. de Chapoleta per I^a esmenda en qué fo condempnatz [vers] merchadiers de Viela Francha qui avia B. de Linars, e fo condempnat ‘per [fals]’ [tot] dos que vendia :  XL s. pergozís.

Item aguem de Peyronela Vigoroza de Sen Martí per I^a esmenda en qué fo condempnada :  X s.

Item aguem de Hel. La Boria filh qui fo Ar. lo [co....anier] per I^a esmenda en qué fo condempnatz :  XL s. pergozís.

Soma :  XXVI lb.  XIX s.  pergozís.

folio 29v

Item aguem de Hel. Fayart de Rua Nuòva per I^a esmenda en qué fo condempnatz :  XXI s. pergozís.

Item aguem de Hugonet de Chatuel sirven de la viela qui trobet un layró de Sen Gòrgi XX s., e d’aquetz XX s. despendet lo layr tant quant estet en la tor VIII s. ; item baylem maych deus XX s. desús dichs a Aymeric de Sudor V s. que baylet a I clerc del Celarier am cuy plageyava per comadamen deus cossols ; resta a la viela :  VII s.

Item aguem de M^e Aymeric Comte, qui anet a Caortz per lo fach del subcidi, e baylet li òm L s. tornés per despens, e estet VII, deus quals L s. desús dichs lo sobreren, los quals aguem, :  XII s. tornés.

Item aguem del emolumen del sayel d’esta viela que te M^e Itier Blanc, per la ma del dich M^e Itier Blanc, LIIII s. IIII d. pergozís, so es assaber per l’an d’antan que era màyer M^e P. La Pòrta lo Joves XX s. IX d., e de l’an d’ogan :  XXXIII s. VII d. pergozís.

Item aguem del emolumen deus mazels de Sen Martí, per la ma de B. Tornier trompador :  XV s. pergozís.

Item aguem de Hel. Chavaugó de Sent Alari, per I prodòme de Sent Alari qui los laychet a la charitat de la Panthacòsta en son testamen :  C s. pergozís.

Item aguem de Hel.de Barri que tornet de París quant anet am M^e P. La Pòrta, que·lh sobreren de la soma de l’argent que lh’avia òm baylat :  XIIII lb. tornés.

Item aguem de Hel. Cluzel per I^a esmenda en qué fo condempnat per las plagas que fetz a P. Bayle :  LX s.

Item aguem de Ar. de La Genebra per I^a esmenda e per I arrest brizat :  XL s.

Item aguem de P. Malet de Sent Alari per I^a esmenda :  XXX s.

Item aguem de M^e Michel lo penhedor e de R. e de Joh. sos filhs, so es assaber per I^a esmenda en qué Hugueta, filha del dich M^e Michel e sòr deus dichs R. e Joh., fo condempnada X lb. pergozís, de las quals X lb. ac Joh. de Manha sirvens del cossolat qui o aportet a la cort LXVI s. VIII d., resta a la viela :  VI lb. XIII s. IIII d. pergozís.

Item aguem deus hòmes de la Ciptat, per lo viatge que fetz òm a París per mandamen del rey quant hi foren citadas las communas, e aneren hi d’esta viela St. del Playchat, Ramnolf de Bodí e P. de Brunet, e trobet òm que aytant se montavan a lor :  X lb. pergozís.

Soma :  LI lb.  V s.  VIII d.  pergozís.

folio 28v (29r blanc)

Ayssò qui s’ensec avem agut de las acessas de la viela.

De [..] de M^e Bonet per la pòrta deus Plantiers :  XLII s.

Item aguem de Hel. de Jaucelm per la escrivania del cossolat :  XXXIII lb. XVIII s. III d.

Item aguem de W. de La Sala per las mezuras del vi :  XVI lb.

Item aguem de Gm. Anhel de Sen Martí per las mezuras de l’òli :  IX lb.

Item aguem de P. de Girardó per lo cot :  XIIII lb.

Item aguem de W. de Plapeyrat per la pòrta Sen Silà :  VII s.

Item aguem de P. Las Coutz per las mealhas del pes de l’Arsaut :  IX lb. XX s.

Item aguem de Bonet de Chaumon per la pòrta Albergaria :  IIII lb.

Item aguem de G. de Gaudí per las mealhas del pes de la Agulharia :  IIII lb.

Item aguem de W. d’Audoy per las mealhas del pes de l’Albergaria :  IIII lb.

Item aguem de Bertran de Caortz per la pòrta del Pon :  XL s.

Item aguem de Bernat R. per las panatarias :  XIIII lb., e IIII lb. que devia maych foren lhi rebatudas que òm lhi devia per los apels que fetz al mespés del pa.

Item aguem de B. Faure del Pon per las mealhas del pes Sen Fron :  VI lb.

Item aguem de N’Ayba de Las Fargas per las bladarias :  XX lb. X s.

Item aguem de de Aymar de Boys per l’encan :  VI lb.

Item aguem de Hel. de Rambert per lo gròs pes de la viela :  XXVII lb. X s.

Item aguem de P. Boní e de G. del Vinhal per las deffalhas de cossolat :  XVI lb.

Item aguem de P. Mercier per la pòrta Agulharia :  XL s.

Item aguem de St. del Puey pel mespés del pa :  LXII lb. VI d.

Item aguem de Hel. Boní per la guarda del blat :  VII lb. IIII s.

Item aguem maych de Hel. Boní per la erba del ptat de la viela :  VII lb. IIII s.

Soma :   XIII^XX e VII lb.  III s.  IX d. pergozís.

folio 28r

Item aguem maych de Hel. Boní per la mezura de las notz :  XX s. perg.

Item aguem, per la ma Hel. Boní, que devia Hel. de Bòrn per la pòrta de l’Arsaut :  XII s.

Item aguem, per la ma Hel. Boní per la pòrta Lemotgana :  XL s.

Item aguem deus beuratges de las acessas, levat per la ma Hel. Boní :  IIII lb. perg.

Soma :  VII lb. e XII s. pergozís.

folio 27v

Ayssò qui s’ensec avem receubut del fach de la acessa de las bostias

Item aguem de la acessa que feyren P. de Las Coutz e B. de Metge am los cossols de l’an passat d’una resta que devian de l’an passat :  XL VII lb. XVII s. VII d.

Item aguem maych, del fach de la acessa de las bostias d’aquest an de la senmana après Nadal, que prezem avans la acessa de Hel. :  IIII lb. IX s. VII d.

Item aguem maych de la acessa de las bostias que Hel. Seguís acesset per la ma del dich Hel. Seguí  VIII^CC e XIIII lb. VI s. pergozís per XLIX senmanas que a tengut las bostias, que se monta la senmana XVI lb. XII s. VI d. perg.

Item aguem del talh qui fo enpauzat a la gen d’esta viela per cossolat :  LII lb. X s.

Item aguem maych del talh VI lb. per la ma de Robbert de Rambert.

Soma :  IX^CC e XXV lb. e IIII s. VI d. pergozís.

folio 26r (27v blanc)

              Ayssò qui s’ensec avem receubut de la charitat del bacó

                                e de la charitat de la Pantacòsta.

Item aguem de la charitat del bacó :  VI lb. VIII s. III d.

Item aguem de la charitat de la Panthacòsta entre pa e deniers :  LXX VIII lb. II s. II d.

Item aguem maych de la charitat de la Panthacòsta de la renda qui es deguda, qui foren bayladas a P. Faure lo Justier per I depte que la viela li devia :  XIII lb. perg.

Soma :  IIII^XX XVII lb.  X s.  V d. pergozís.

                 Fin de ce registre

<<Retour

---

[1]- Hardy lit la melha (?) et traduit « supplice de l’énervation »...

[2]- sans doute M^e Vidal Beraut, consul l’année précédente

[3]- Hardy traduit. « traîné par les chemins »...

[4]- ss doute : départ pour la croisade (cf folio 10r : quant lo reys pres la crotz )

[5]- ‘…’ rajouté dans l’interligne.

[6]- msc la estieyra, mauv. coupe.

[7] - sans doute l’interdiction de citer ces hommes,relevant de la juridiction de Périgueux, devant la justice du comte…

[8]- msc queys, contract. de que es

[9]- non sans doute contract. de nos ne,  enformeren nos ne : ils nous en informèrent ; suit un mot, avec un signe d’abrév.,que je n’identifie pas

[10]- au sens de propriétaire ? peut-être confusion avec senhet = marque de propriété