<<Retour

Source : Bulletin SHAP, tome LV (1928) pp. 95-97.

 

MÉMOIRE DE LA NOBLESSE DE PIERRE FAURE DE LA MOTHE

 

Entre 1583 et 1590. - (Orig. papier, communiqué par Mme de Montégut, née Faure de Saint-Romain.)

 

Pour ses faitz, extraits, par devant tous, Monsieur le Commissaire, Guilhaume Faure, escuyer, seigneur de La Mothe et de Champaignac en toute justice, conseilher du Roy et guarde des sceaux en lad. court présidialle de Perigeux, dit et maintient ce que s'ensuit, pour en estre faict preuve et vérification, contre Monsieur le Procureur du Roy et aultres parties qu'il appartiendra.

En premier lieu, qu'a esté vivant feu Pierre Faure, escuyer, seigneur de Lussas, bisayeul aud. sr de Lamothe, estant gentilhomme vivant noblement, receu au renc et nombre des nobles, ez honneurs et hautoritez deubtz et appartenans à la noblesse.

Auquel succéda Jean Faure, escuyer, seigneur de Lussas, Fontroubade, Beauvoys. Lamothe, son fils naturel et légitime, tenant les susd. terres et seignuries noblement et en tout droit de justice haulte, moyene et basse, mère et mixte, impere, à hommage du Roy de Navarre, compte de Périgord, viscompte de Limouzin, à cause de sa baronnie de Nontron aud. pays de Perigort, et à l'omage aussy du sr baron de Mareuil.

Et au respect de ce que se faizoit et traictoit en leurs maizons pour festins, nopces, baptesmes, sépultures, honneurs, les prinsipaulx appelles estoient nobles, leurs parans, amis et voisins, et ou a esté observé ce qu'est receu et ordonné entre les gentilshommes de tous temps et antienetté.

Estoient en oultre exemptz de toutes contributions et tailhies, desquels les roturiers et non nobles sont obligés.

Au contrayre, lesd. Faures et leurs predeseseurs estoient employés au ban et arrière ban de Perigort, fait le service lorsque les ocazions se sont présentées, s'il n'y a lieu empêchement de maladie, et a esté le tout continué par leurs sussesseurs.

Dudit feu Jehan Faure, escuyer, son decendus noble Pierre Faure l’hayné, conseigneur de Lussas, Fontroubade, coneeilher et procureur du Roy en Perigort.

Dauphin Faure, conseigneur de Lussas, Fontroubade, Savigniac et Augigniac, lesd. parroisses de Savigniac et Auginiac par luy acquizes en justice, esleu pour le Roy en Perigort.

Jehan Faure, seigneur de Beauvoys, homme d'armes de la compagnie du feu Roy de Navarre.

Gerault Faure, seigneur de Mensigniac, official et grand vicaire de Monsieur de Perigeux, chanoyne des deux esglizes cathedralle et colegialle dud. Perigeus.

Pierre Faure, seigneur de Lamothe, conseilher d[u Roy], juge magistrat criminel en lad. seneschausée de Perigort ; ses enfans naturels et légitimes et de la damoizelle Jehane de Puysilhon, sa femme.

Dud. Pierre ayné, et de son loyal mariage avec damoyselle Bertrande de Prouilhac, sont venus Francoys et Guy Faures, conseigneur de Lussas, Fontroubade, sr de la Ribeyrie, gensdarmes de la compaignie du Roy de Navarre ; et led. Guy ayant esté fait prisonnier par l’Espaniol, faisant service à Monsieur le dud d’Angou, frère du Roy, en son armée de Flandres, alors que le sr de Thurene fust prins.

D'iceluy Dauphin et de damoyselle Jehanne de Prouliac, sa femme, sont venus Jehan l'ayné, Gerault, aultre Jehan Faures, tous decedés.

Iceluy Jehan l’ayné, sr de la Rouderie.: Savigniac et Auginiac, conseilher du Roy en sa court de Parlement de Bourdeaux, qui a heu charge d'une compaignie de gens de pied au régiment de feu Monsieur le compte de Brissac, et despuys commandement de Sa Majesté de gouverneur à Limoges, ayant fait plusieurs et notables exploits de guerre pour son service, tant au siège de La Rouchelle que armées royalles.

Led. Gerault, seigneur de La Roche Pontisac, recepveur géneral en Perigort pour Sa Maiesté.

Ledict Jehan le jeune, seigneur de Savigniac, gentilhomme ordinere de la maison du Roy de Navarre.

Quand à iceluy Jehan Faure, sieur de Reauvoys, est cédé sans hoirs et vescu longuement, porté les armes en plusieurs expéditions pour le service de Sa Maiesté.

D'iceluy feu Pierre Faure, seigneur de Lamothe, juge magistral criminel, et de damoiselle Magdelene de Lulier, filhe de feu Monsieur Me Jehan Lulier, escuyer sr de Lamothe des Grix, Quinquempoix et Frenaux, conseilher du Roy en la Cour de Parlement à Paris.

Est provenu led. seigneur de Lamothe, [Guillaume Faure, escuier, sr de Lamothe, coseigneur de Champaigniac, conseiller magistrat pour le Roy et garde des sceaux en la sénéchaussée de Perigort, qui a comparut à 1’assemblée des Trois Etats de Périgord faite en la ville de Sarlat le 13 juin 1583], demandeur, lequel, oultre sa charge et de debvoir en la justice; a fait profection des harmes, ayant heu charge en chef d'une compaignie de gens de pied au régiment de Monsieur de Puyferrat en l'armée du Roy en Guyenne, conduyte par Monsieur le Mareschal de Biron, en l’année mil cinq centz quatre vingtz.

Commandé aussy heureusement en la ville et chasteau de Nontron, par commandement de feu Monsieur de Bourdeilhe, seneschal et gouverneur du Perigort.

La conversation des susd. et de leurs prédécesseurs a este de tout temps noble, honeste, acommodée aux harmes, aulx chevaulx, oizeaux de proye et aultre, chasse de chiens lévriers, courantz, et aultres, qu'ilz ont entretenu, et les vivans continuent.

Ont officiers en leurs justices et ont heu sy devant, comme juges, lieutenans, procureurs d’office, greffiers, prevostz et sergents.

Aux esglizes de leurs justices, les sainctures (1) dedans et dehors, avec leurs escuseaux et harmories, nobles et marquées de signes de noblesse.

Aux sépultures, grandz theus (2) avec les draptz noirs, avec les escuseaulx et harmonies, et sepulchres et harmories acoustumées entre nobles en Perigort, y sont et ont esté entierement observés.

Eux et leurs predessesseurs tenus et réputés nobles, et de noble et entieue ligniée, et don en est voix et fame publicque entre toutes personnes de respect.

Les antiens l'ont veu, sceu, et entendu dire à leurs pères et ayeuls, gens vieux et antiens.

Dict que pendant les troubles, le lieu de Nontron. où il avoit sa maizon originere et ses tiltres, a esté prinze et pillée par l'armée de ceux de la Religion pretandue et refformée, ses tiltres entiers rompus, brisés, mis au feu, quoy que soit la plus grande partie et le semblable advenu aux aultres catholiques faisant service au Roy.

 

Pour copie conforme : G. Lavergne.

(1). Ou Litres.

(2) Cercueils.

 

<<Retour